मुथुलक्ष्मी रेड्डी

*सुधारक डॉ. मुथुलक्ष्मी रेड्डी *

********************************

जन्म - ३० जुलै १८८६

स्मृती - २२ जुलै १९६८ (चेन्नई)

शिक्षक, सर्जन आणि समाज सुधारक डॉ. मुथुलक्ष्मी रेड्डी यांचा जन्म ३० जुलै १८८६ रोजी तत्कालीन मद्रास प्रांतातील पुडुकोट्टाई संस्थानात झाला.

मुथुलक्ष्मी रेड्डी या भारतातील पहिल्या महिला विधिमंडळ सदस्या म्हणजे आमदार होत्या. त्यांचे वडील नारायण स्वामी हे चेन्नईच्या महाराजा कॉलेजचे प्राचार्य होते. तो केवळ पुरुषांनीच शिक्षण घ्यायचा काळ. महिलांचे जीवन केवळ चूल आणि मूल यापुरतेच मर्यादित. अशा परिस्थितीत मुथूलक्ष्मींनी मॅट्रिक पर्यंतचे शिक्षण पूर्ण केले.

शिक्षणाची आवड आणि बंडखोर स्वभावामुळे पुढचे शिक्षण घ्यायचे ठरले. त्यांची आई त्यांच्या या निर्णयाच्या मागे ठामपणे उभी राहिली. मुथूलक्ष्मीनी चेन्नईच्या महाराजा कॉलेज मध्ये प्रवेश घेतला. तिथून पदवी घेतल्या नंतर त्यांनी मद्रास मेडिकल कॉलेज मध्ये प्रवेश घेऊन तो अभ्यासक्रमही पूर्ण केला. त्यानंतर त्या मद्रासच्या शासकीय मातृत्व व नेत्र रुग्णालयात महिला सर्जन (शल्यविशारद) म्हणून रुजू झाल्या. 

डॉ. मुथूलक्ष्मी रेड्डी यांनी स्थापन केलेल्या 'वुमेन्स इंडिया असोसिएशन' तर्फे त्यांनी राजकारणात प्रवेश केला. त्यानंतर १९२६ साली त्या मद्रास विधिमंडळाच्या सदस्या बनल्या. अशा रितीने विधिमंडळाच्या सदस्या बनणाऱ्या त्या पहिल्या भारतीय महिला बनल्या. जगातील कोणत्याही विधिमंडळाच्या पहिली महिला उपाध्यक्ष म्हणून त्यांचे नाव इतिहासात नोंदले गेले. 

डॉ. मुथुलक्ष्मी रेड्डी यांचे २२ जुलै १९६८ रोजी निधन झाले